حثالة شركات الاستثمار و العقار
Posted on 29. Jan, 2009 by Ali in business, Work
الكل حاس بالازمة العالمية حاليا بعد التفنيشات العقيمة اللتي صابت غلوبل و هي واحدة من (اشهر) شركات الاسثتمار الكويتية. هذه التفنيشات حصلت بعد الهبوط الحاد اللي طال مصادر رزق هذه الشركات التي تبين انها لا تعرف قوعها من بوعها في شي اسمه استثمار. المشكلة انه اللي يطيح في المشكلة المسكين انا و انت اللي موظفين طرقنا المعاش. و لا هذول اصحاب الشركات و مدرائها كانوا يعيشون على فلوس المساهمين برواتب وهمية و اللحين قاعدين يطرون من الحكومة تعالوا ساعدونا. المشكلة انه مو سامعين المثل الشهير (التجارة ربح و خسارة) لانه اغلبهم وصلوا المناصب اللي هم فيها لانهم عيال فلان و علان او من جماعة فلان و فلتان. المهم بعد الخساير المتخمة التي تكبدتها هذه الشركات قامت بالطبع بفرض حالات الاستعداد للتفنيش و ارويلكم اللي صار عندنا في الشركة العقارية اللي مدرجة في قطاع الخدمات
آول ما بدوا انه قالوا ترى مدير الشركة ما يحب التجمعات و لاحد يتكلم مع الثاني شكله ردينا ايم الغزو اللي ممنوع التجمعات
ثاني يوم قالوا لا يبه ترى كمبيوتراكم مراقبة و اللي يسوي شي غير الشغل ترى نشوف له صرفه المشكلة انه الشركه مافيها شغل خير شر غير طبعا المدراء اللي ما يدرون عن موظفينهم
ثالث شي سووا اللي قاموا قالوا لا يبه ماندري شنسوي يمكن نفنشكم يمكن نقص معاشاتكم
المشكلة انه كل اللي نسمعه هو قيل و قال و ماكو شي اكيد وحنا الموظفين عايشين على اعصابنا
رابع شي قالوا لا يبه مانبي نفنش احد و اللي راح يصير انه لازم تقدمون اجازات بدون راتب و اللي ما ياخذها ما نعطيه معاشه هل الشهر بس وعدونا انه الراتب ماراح ينقص منه شي
الكل وافق و وقع
خامس شي سووا بعد التوقيع قالوا لايبه غيرنا راينا الكل مخصوم
مع العلم تم اجبار الموظفين باخذ اجازة من دون راتب و اخذ خصم عليهم و من دون توقيع عقود جديدة
سادس شي نزلت الشركة تصريح صحفي انه مشاريعها ماشية عال العال في الامارات و مارا تتاخر
و انا ما اقول الا طيييييط
المهم
بنهاية الحديث انا مستعد اني اعيش من دون راتب على ان الحكومة ما تساعد هذه الشركات اللي يختالها اللعب و الغش و الافتراء و البوق من كبيرها لين صغيرها و كل على حساب المساهمين و حساب الموظفين
و اخر الحديث انا لله و انا اليه راجعون
moayad
29. Jan, 2009
اوباما اليوم (أمس) تكلم عن نفس الموضوع !
كان يخاطب مدراء البنوك بخطاب شديد اللهجة و يقول لهم إذا فعلا تبون تعالجون مشاكلهم فعليكم إنكم تبدون بأنفسكم ، الأولى هو تخفيض مكافآتكم الشخصية قبل لا تطالبون إنقاذ الحكومة لكم و لموظفيكم ، و قال إنه هذا مو وقت جمع أرباح.. بل هو وقت معالجة أزمة… وقت الأرباح لاحقين عليه بعد ما تعدي الازمة
http://edition.cnn.com/video/#/video/politics/2009/01/16/dcl.malveaux.obama.econ.cnn
و كذلك قبل جم يوم في فرنسا صارت مشكلة مشابهة بين الحكومة و مدراء البنوك اللي ياخدون أجور خيالية في هذا الوقت العصيب ، و شلون إن لازم يراجعون هالمسألة في هالوقت
يعني المشكلة عالمية و مو بس عندنا ، لكن الفرق إن هناك في حكومات و جماعات أخرى قاعدة تتكلم و تضغط ، بينما عندنا….. انت ادرى بالحال !